សមាជិកសភាអាស៊ាន អំពាវនាវទៅរដ្ឋសមាជិក និងសហគមន៍អន្ដរជាតិ ត្រូវបង្ខំឲ្យរដ្ឋាភិបាលកម្ពុជា ឲ្យប្ដេជ្ញាគោរពតាមលទ្ធិប្រជាធិបតេយ្យ និងសិទ្ធិមនុស្សឡើងវិញ ពិសេសគោលការណ៍ ដែលមានចែងក្នុងកិច្ចព្រមព្រៀងទីក្រុងប៉ារីស ឆ្នាំ១៩៩១

សមាជិកសភាអាស៊ាន អំពាវនាវឲ្យសហគមន៍អន្ដរជាតិ ចាប់បង្ខំរដ្ឋាភិបាលកម្ពុជា ឲ្យគោរពលទ្ធិប្រជាធិបតេយ្យ និងកិច្ចព្រមព្រៀងទីក្រុងប៉ារីសឡើងវិញ។

ការអំពាវនាវនេះធ្វើឡើងបន្ទាប់ពីរដ្ឋាភិបាលកម្ពុជា បានបិទប្រព័ន្ធ​ផ្សពផ្សាយឯករាជ្យមួយចំនួន និង​បិទ​អង្គការ NDI ដែលធ្វើការលើកស្ទួយលទ្ធិប្រជាធិបតេយ្យនៅកម្ពុជា។

ក្នុងសេចក្ដីថ្លែងការណ៍​ ចេញផ្សាយនៅថ្ងៃព្រហស្បតិ៍នេះ សមាជិកសភាអាស៊ានដើម្បីសិទ្ធិមនុស្ស (ASEAN Parliamentarians for Human Rights) បានបង្ហាញក្ដីបារម្ភ អំពីបញ្ហាសិទ្ធិមនុស្ស និងលទ្ធិប្រជាធិបតេយ្យ នៅកម្ពុជា ដោយថា រដ្ឋាភិបាលបានបើកការបង្ក្រាបលើបណ្ដាញសារព័ត៌មានឯករាជ្យ និងក្រុមអង្គការសង្គមស៊ីវិល ព្រមទាំងបណ្ដេញបុគ្គលិកវិទ្យាសា្ថនជាតិប្រជាធិបតេយ្យ “NDI” របស់អាមេរិក កាលពីពេលថ្មីៗនេះ។

សមាជិកសភាអាស៊ានដើម្បីសិទ្ធិមនុស្ស អំពាវនាវទៅរដ្ឋសមាជិក និងសហគមន៍អន្ដរជាតិ ត្រូវបង្ខំឲ្យរដ្ឋាភិបាលកម្ពុជា ឲ្យប្ដេជ្ញាគោរពតាមលទ្ធិប្រជាធិបតេយ្យ និងសិទ្ធិមនុស្សឡើងវិញ ពិសេសគោលការណ៍ ដែលមានចែងក្នុងកិច្ចព្រមព្រៀងទីក្រុងប៉ារីស ឆ្នាំ១៩៩១

ប៉ុន្ដែអ្នកនាំពាក្យគណបក្សប្រជាជន លោក សុខ ឥសាន​ លើកឡើងថា ចំណាត់ការថ្មីៗនេះ គឺរដ្ឋាភិបាលកំពុងពង្រឹងការអនុវត្តច្បាប់ ទៅលើអង្គការ សមាគម និងបណ្ដាញសារព័ត៌មានបរទេស ដែលលោកថាមិនគោរពច្បាប់កម្ពុជាប៉ុណ្ណោះ។

ជុំវិញការបិទអង្គការមនុស្សធម៌ NDI កាលពីថ្ងៃទី២៣សីហាកន្លងទៅ ទូតអាមេរិកប្រចាំកម្ពុជា ក្រសួងការបរទេសអាមេរិក អង្គការសហប្រជាជាតិ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) និងអង្គការឃ្លាំមើលសិទ្ធិមនុស្សអន្ដរជាតិ (Human Rights Watch) បានរិះគន់រដ្ឋាភិបាលកម្ពុជា ដោយថា លោក ហ៊ុន សែន គួរបញ្ឈប់សកម្មភាពគំរាមកំហែងទាំងនេះចោល បើពុំនោះទេ លទ្ធផលបោះឆ្នោតនាឆ្នាំ២០១៨ នឹងមិនអាចជឿទុកចិត្តបានឡើយ៕

ប្រភព៖​VOA