តើលោកអ្នកចង់ស្រកទម្ងន់ទេ សូមមើលវិធីងាយៗ
វិធី ងាយៗមួយចំនួនដើម្បីកាត់បន្ថយកាឡូរីដោយគ្រាន់តែអ្នកត្រូវអនុវត្តសកម្មភាពខាងក្រោមឱ្យក្លាយជាទម្លាប់ប្រចាំថ្ងៃ ៖
១-បរិភោគ តិចៗ៤ទៅ៥ដងក្នុងមួយថ្ងៃ
ជំនួសឱ្យការបរិភោគអាហារយ៉ាងច្រើនក្នុងពេលតែមួយ អ្នកអាចបែងចែកបរិមាណអាហារដូចគ្នានេះទៅជាទំហំ តូចៗវិញដោយបរិភោគវា៤ទៅ៥ដងក្នុងមួយថ្ងៃ
អត្ថប្រយោជន៍នៃការអនុវត្តយុទ្ធសាស្ត្រនេះគឺអ្នកអាចដោះស្រាយបញ្ហានៃការឃ្លានមិនត្រូវពេលបានយ៉ាងងាយស្រួលដោយមិនបារម្ភថា អ្នកនឹងទទួលទានកាឡូរីលើសចំនួន ។
២-បរិភោគផ្លែឈើជាអាហារសម្រន់
ជំនួសឱ្យការបរិភោគអាហារដែលមិនល្អចំពោះសុខភាពជាអាហារសម្រន់ វាជាវិធីដ៏ល្អបំផុតក្នុងការជ្រើសរើសផ្លែឈើស្រស់មកធ្វើជាអាហារសម្រន់ ។ យើងទាំងអស់សុទ្ធតែដឹងហើយថា ផ្លែឈើសម្បូរទៅដោយជាតិសរសៃ និងជាតិទឹកដែលពួកគេអាចធ្វើឱ្យយើងមានអារម្មណ៍ថាឆ្អែតបានយ៉ាងងាយស្រួល ។ ម្យ៉ាងទៀតផ្លែឈើសម្បូរទៅដោយសារជាតិរ៉ែ និងវីតាមីន សំខាន់ៗជាច្រើនពួកវាមានកម្រិតជាតិខ្លាញ់ និងកាឡូរីទាប ដូច្នេះអាចរក្សាទម្ងន់រាងកាយរបស់យើងដោយមិនបង្កើនទំហំចង្កេះ ។
៣-ទទួលទានបន្លែឱ្យបានច្រើន
ការទទួលទានបន្លែជំនួសឱ្យបាយ ឬផាស្តាយអាចជួយកាត់បន្ថយកាឡូរី ។ ការចាប់ផ្តើមទទួលទានអាហារដោយការទទួលទានបន្លែ ឬសាឡាត់ ហើយបន្ទាប់មកចំណីអាហារសម្បូរកាបូអុីដ្រាត គឺជាការណែនាំមួយ ។ យើងក៏មានហេតុផលសម្រាប់រឿងនេះផងដែរ ។ បន្លែផ្ទុកទៅដោយជាតិសរសៃ ហើយវាត្រូវការពេលវេលាដើម្បីរលាយ ដូច្នេះអ្នកអាចមានអារម្មណ៍ឆ្អែត ធ្វើឲ្យបរិមាណនៃការបរិភោគអាហារនឹងមានតិច ។
៤-ទទួលទានទឹកឱ្យបានច្រើន
ការទទួលទានទឹកឱ្យបានច្រើន គឺជាវិធីដ៏ល្អដើម្បីកាត់បន្ថយកាឡូរី ។ ការសិក្សាបានបង្ហាញថា ការទទួលទានទឹក០,៥លីត្រអាចនាំឱ្យមានការដុតកាឡូរីក្នុងអំឡុងពេលមួយម៉ោងកាន់តែច្រើន ឡើងៗ ហើយដូច្នេះវាអាចជួយអ្នកសម្រកទម្ងន់បាន ។ ស្របគ្នានេះដែរការទទួលទានទឹកមុនពេលបរិភោគអាហារអាចនាំឱ្យមានការកាត់បន្ថយការឃ្លាន ដូច្នេះវាក៏នឹងជួយក្នុងការបន្ថយកាឡូរី ។
៥-ការចម្អិនអាហារដោយខ្លួនឯង
ការចម្អិនអាហារនៅផ្ទះដោយខ្លួនឯងគឺជាជំរើសដ៏ល្អចំពោះសុខភាពដោយសារយើងអាចចម្អិនម្ហូបអាហារតាមបំណងប្រាថ្នារបស់យើង ហើយកត្តានេះមិនអាចធ្វើទៅបានទេជាមួយអាហារដែលយើងបរិភោគនៅខាងក្រៅផ្ទះ ។ យើងតែងតែជ្រើសរើសអាហារដែលមានកាឡូរី ទាប និងមានអាហារូបត្ថម្ភនៅពេលយើងចម្អិនអាហារនៅផ្ទះ ដូច្នេះវាអាចជាមធ្យោបាយដ៏ល្អដើម្បីកាត់បន្ថយកាឡូរី ៕
Comments
Post a Comment